فيه ستات ملهاش نقطة ضعف ..
لا وسامة و لا فلوس ولا شهرة
بتحب كل دول لكن عمرها ما ضعفت قدامهم
ولا عندها نية إنها تتنازل في مقابل أي حاجة منهم
النوع ده التعامل معاه بيبقى مرهق عند بعض الرجالة
خليني أعترف إن فيه رجالة بتحب الست اللي
عندها ثغرة .. نقطة ضعف يعنى ..
مدخل يقدر يقتحم منه حاجة يقدر يمسك بيها زمام الأمور
واحدة تكون ليها مالكة زي ما بيقولوا ..
فيتملكها و يستغل ضعفها قدام الحاجة اللي بتحبها
فيقدر في كل مرة يخليها ترجعله من نفس المدخل مهما حصل
الست القوية اللي ملهاش نقطة ضعف
دي بقى لما بتنكسر بتتقسم لنصين اتنين غير قابلين للتصليح
لأنها بتكون وثقت و قدمت و حبت بدون مصلحة
ولا مغريات وثقت ولقت إن الثقة مطلعتش في محلها
وقتها هتشوف شخص تاني خالص
مختلف تماما عن اللي عرفته ....
الخذلان بيحول النوع ده من الستات
لشخص تاني غير اللي حبك و عرفك
شخص إنت ممكن تخاف منه حرفيا
وده لأنها ملهاش نقطة ضعف ممكن تماين عشانها
أو ترضخ ليك عشان تفوز بالحاجة اللي بتضعف قدامها
و لما بتقفل الباب بتقفله بميت ترباس
إنت وقتها هتتعجب من الجبروت ده
إزاي و كان مستخبي فين
و هتصمد قدامك راس براس
وعمر ما فيه مغريات ممكن تخليها تتنازل عن قرارها
النوع ده بقى طلباته بسيطة جدا ..
إن ثقتها فيك تكون
في محلها مع حبة إحتواء و تقدير
وقتها هتحس إن هي و الدنيا كلها بين ايديك و في حضنك
أما وسامتك و فلوسك و كلامك الحلو بالنسبالها حبة سبرتو
مجرد ما تفتح الغطا هيطير
كل مجهود بتعمليه اكتر من المفروض
مش هيتقدر زى ما انت قدرتيه
كل حب ازيد من اللازم طاقه مهدوره
كل دور تطوعتي انك تعمليه بيتحول من جدعنه
ل ايه يعني لما عملت كدة
التضحيه في غير محلها خيبه
والمشاعر الحلوة كترتها مش حلوة
عشان بتتدلق برة الكوباية
علي سلامك النفسي
