الإمان انك تكون مطمن ومش خايف
انك تحس ان اللي قدامك مضلل عليك
محاوطك من كل ناحيه
حتي لو مش جنبك حقيقي
بس حاسس بروحه حواليك
حاسس بعنيه بتبص عليك وتحميك
حاسس بايده و هي بتطبطب عليك
في عز لحظات وجعك وخوفك
إحساس اشبه و اقرب للامومة او الابوة
منه للحب العادي او المتعارف عليه
من وجهة نظري ان إحساس الامان دة أحلي
واهم بكتير من الحب العادي
تلاقي نفسك بين ايديه علي طبيعتك
مابتتكسفش تبين ضعفك و دموعك قدامه
بالعكس دة انت بتحس انك محتاج تكون كدة قدامه
هو بالتحديد
بتحس اول مابتشوفه ان روحك بتهدي و قلبك
بيطمن ويرتاح بتحس انك عايز تجري ترمي نفسك في حضنه
عايز تفضل ماسك ومتبت في ايده
انت في الاول و الاخر بشر
بتحس و ليك طاقة و
ليك قوة تحمل
ما ينفعش تبقي طول الوقت واقف
علي رجلك و حامي الكل و ساند الكل
طيب ما هو انت كمان محتاج اللي يحميك و يسندك
محتاج اللي يحتويك و يستوعب ضعفك
من غير ما يستغل الضعف دة
محتاج اللي ترمي همومك بين ايديه عشان تقدر
تكمل و تشيل هموم غيرك
الامان هو انك تبقي عارف ان في شخص في حياتك
هيفضل موجود وانه جمبك وقت متحتاجه هتلاقيه جنبك
سند و امان ليك وانت ف أسوء حالاتك
وانك وقت متختلف معاه تتكلم وانت عارف
انه مش هيفهمك غلط وان مهما وصل الخلاف بينكم
تبقي عارف انه مش هيجرحك بكلامه
لان في الاخر دا مجرد خلاف و هيروح لحاله
انما انتوا مكملين
الامان انك متبقاش خايف وانت بتقول اللي جواك
الامان انك متحسش انك علاقتكم ببعض علي كف عفريت
لأ دا انت تبقي متأكد ان لو الدنيا كلها اتجمعت علي
انكم متكملوش انتوا تكملوا غصب عن اي حد
الامان انك تكون قاعد ومطمن
وعارف انه هيدافع عنك لو وسط مليون واحد غلطوا في حقك
الامان هو نظره عين منه و كأنه بيقولك انا هنا
انا موجود عشانك
انا فاهمك صح و الاهم من كل دا انا مش ممكن اخذلك
الامان ان الشخص دا يطمنك بوجوده
مش يهددك بغيابه
الامان والاحتواء هو اجمل احساس ممكن
تحسه في الدنيا
وشخص واحد بس اللي انت ممكن تلاقي نفسك حاسس
معاه بالأمان المطلق
مش بتلاقيه بسهولة ممكن تصادفه في العمر مرة
و ممكن ماتصادفوش خالص
بس لما بيحصل و تصادفه
و تلاقيه بجد .. بيكون
هدية من ربنا ليك
كأن ربنا بيعوضك عن كل التعب اللي انت شوفته في حياتك
و بيكافئك علي تحملك و صبرك و عطائك للاخرين
حتي و لو علي حساب نفسك
بيبعتلك اللي يفضلك علي نفسه
زي مانت فضلت الكل علي نفسك
بيبعتلك اللي يحبك و يخاف عليك و يحتويك
ويمد ليك ايده زي مانت خايف عالكل و شايل هم
الكل ومادد ايدك بالمساعدة للكل
عوض ربنا مافيش احلي منه ..
و ربنا طول الوقت
بيبعتلنا رسايل و يعرفنا ان مافيش حاجة بتضيع ابداا
سواء خير أو شر
ربنا يعوضنا و يرزقنا جميعا بالناس اللي تكون لينا الامان
و الراحة
في زمن كله وجع
